लहान, सिरहा
लहान नगरपालिकाद्वारा निर्माण भइरहेको नगर अस्पतालको निर्माण कार्य तीव्र गतिमा अघि बढ्दै हालसम्म ७१ प्रतिशत सम्पन्न भएको छ। निर्माण कम्पनीका अनुसार आगामी असोज महिनाभित्र अस्पतालको सम्पूर्ण निर्माण कार्य पूरा गरी नगरपालिकालाई हस्तान्तरण गरिनेछ।
आज लहान नगरपालिकाका मेयर महेश चौधरीले निर्माणधिन नगर अस्पतालको स्थलगत निरीक्षण गर्नुभएको छ। निरीक्षणका क्रममा मेयर चौधरीले निर्माण कार्यको गुणस्तर र प्रगतिको बारेमा जानकारी लिनुका साथै तोकिएकै समयमा काम सम्पन्न गर्न निर्माण कम्पनीलाई निर्देशन दिनुभयो।

हस्तान्तरण लगत्तै सेवा सुरु गरिने
निरीक्षण पश्चात् सञ्चारकर्मीहरूसँग कुरा गर्दै मेयर महेश चौधरीले अस्पतालको भवन निर्माण सम्पन्न भई नगरपालिकालाई हस्तान्तरण हुने बित्तिकै बिना कुनै ढिलाइ अस्पताल सञ्चालनमा ल्याइने प्रतिबद्धता व्यक्त गर्नुभयो। नगरवासीलाई स्थानीय स्तरमै गुणस्तरीय स्वास्थ्य सेवा उपलब्ध गराउन नगरपालिका पूर्ण तयारीका साथ लागेको उहाँको भनाइ थियो।

महिला र बालबालिकाका लागि विशेष सुविधा
यस नगर अस्पतालले विशेष गरी महिला तथा बालबालिकाहरूलाई लक्षित गरी विशेष स्वास्थ्य सेवा र सुविधाहरू प्रदान गर्ने जनाइएको छ। मातृत्व सेवा, बाल स्वास्थ्य र प्रसूति सेवालाई उच्च प्राथमिकतामा राखेर अस्पतालमा आवश्यक उपकरण र दक्ष जनशक्तिको व्यवस्थापन गरिने योजना नगरपालिकाको छ।
"नगरवासीलाई गुणस्तरीय स्वास्थ्य सेवा दिन हामी प्रतिबद्ध छौँ। असोजमा भवन हस्तान्तरण हुनासाथ अस्पताल तुरुन्त सञ्चालनमा आउनेछ, जसबाट विशेष गरी महिला र बालबालिकाहरू बढी लाभान्वित हुनेछन्।"
— महेश चौधरी, मेयर (लहान नगरपालिका)

अस्पताल निर्माण कार्य अन्तिम चरणमा पुगेसँगै अब सामान्य उपचारका लागि पनि टाढा जानुपर्ने लहान र आसपासका सर्वसाधारणको बाध्यता हट्ने विश्वास गरिएको छ।

Photo:- Shambhu Yadav