रहमुल, सप्तरी, ५ फागुन।
महिला तथा बालबालिका सशक्तीकरणलाई मूल नाराका रूपमा अघि सार्दै सुरुङा नगरपालिका वडा नं. ७, समसेरपुरमा दोस्रो सुरुङा राष्ट्रिय महिला भलिबल प्रतियोगिता २०८२ उत्साहपूर्ण वातावरणमा सुरु भएको छ। फागुन ५ गतेदेखि प्रारम्भ भएको प्रतियोगिता फागुन ९ गतेसम्म सञ्चालन हुने आयोजकले जनाएको छ।
राष्ट्रिय खेलकुद परिषद् को सहयोगमा आयोजना गरिएको प्रतियोगिताको संयोजन “हामी सखी एक अर्काको लागि” सुरुङा नगरपालिका वडा नं. ५ ले गरेको हो। ग्रामीण क्षेत्रमा लुकेर रहेका महिला प्रतिभाको पहिचान, खेलकुदमार्फत आत्मविश्वास अभिवृद्धि तथा सामाजिक सशक्तीकरणलाई प्रवर्द्धन गर्ने उद्देश्यले प्रतियोगिता आयोजना गरिएको हो।
उद्घाटन समारोहमा व्यापक सहभागिता
वडा नं. ७ का वडाध्यक्ष शिव नारायण चौधरीको अध्यक्षतामा सम्पन्न उद्घाटन समारोहमा सुरुङा नगरपालिकाकी मेयर गीता चौधरी प्रमुख अतिथिका रूपमा उपस्थित रहनुभएको थियो। उप–मेयर रुद्र बहादुर कार्की, वडा नं. ६ का अध्यक्ष दिनेश कुमार राम, राम भरोश मोची लगायत जनप्रतिनिधि, सामाजिक अगुवा, प्रधानाध्यापक, खेलकुदकर्मी, प्रशिक्षक, रेफ्री तथा सञ्चारकर्मीहरूको उल्लेखनीय उपस्थिति रहेको थियो।
सामुदायिक भवनका जग्गादाता समुजलाल चौधरी र सीताराम चौधरी, धाती बजारका वरिष्ठ धान व्यवसायी देबनाथ यादव, समाजसेवी शुभनारायण चौधरी, विभिन्न विद्यालयका प्रधानाध्यापक तथा स्थानीय खेलप्रेमीहरूको सहभागिताले कार्यक्रमलाई थप गरिमामय बनाएको थियो। कार्यक्रमको सञ्चालन बिशेन्द्र पासवानले गर्नुभएको थियो।
राष्ट्रिय गानबाट सुरु भएको कार्यक्रममा वडा नं. ५ का अध्यक्ष दिलाराम चौधरीले स्वागत मन्तव्य व्यक्त गर्दै महिला खेलाडीहरूलाई निरन्तर अभ्यास, अनुशासन र आत्मविश्वासका साथ अगाडि बढ्न प्रेरित गर्नुभयो।
चार जिल्लाका टोलीबीच प्रतिस्पर्धा
प्रतियोगिताको उद्घाटन खेलमा मोरङ, काठमाडौं, बारा र सप्तरीका महिला टोलीहरू सहभागी भएका थिए। उद्घाटन खेलअन्तर्गत टिपटप काठमाडौं र सुन्दरहरैचा मोरङ बीच प्रतिस्पर्धा भएको थियो।
खेलमा टिपटप काठमाडौंले उत्कृष्ट समन्वय र आक्रामक रणनीति प्रस्तुत गर्दै लगातार तीन सेटमा सहज जित निकालेको छ। पहिलो सेट २५–९, दोस्रो सेट २५–६ र तेस्रो सेट २५–७ को फराकिलो अन्तरले जित्दै टिपटपले एकपक्षीय रूपमा खेल आफ्नो पक्षमा पार्‍यो। सशक्त सर्भिस, मजबुत ब्लक र उत्कृष्ट टिमवर्क टिपटपको जितको आधार बन्यो। उद्घाटन खेलमै दर्शकहरूले उच्चस्तरीय र रोमाञ्चक प्रतिस्पर्धा अवलोकन गर्न पाए।
आकर्षक नगद पुरस्कार
प्रतियोगितालाई थप प्रतिस्पर्धात्मक बनाउन आयोजकले आकर्षक नगद पुरस्कारको व्यवस्था गरेको छ।
प्रथम विजेता: रु १ लाख ५१ हजार
द्वितीय विजेता: रु १ लाख १ हजार
तृतीय विजेता: रु ५१ हजार
साथै ट्रफी र प्रमाणपत्रसमेत प्रदान गरिनेछ।
खेलमार्फत सकारात्मक सन्देश
प्रमुख अतिथि मेयर गीता चौधरीले खेलाडीहरूलाई हौसला प्रदान गर्दै सुरुङामा लागू औषध नियन्त्रण तथा युवालाई सकारात्मक दिशातर्फ उन्मुख गराउन समय–समयमा विभिन्न खेलकुद कार्यक्रम आयोजना गरिँदै आएको बताउनुभयो।
“सुरुङाको खेलाडी राष्ट्रिय तथा अन्तर्राष्ट्रिय स्तरसम्म पुगून् भन्ने हाम्रो लक्ष्य हो,” उहाँले भन्नुभयो, “खेलकुदले समाजमा अनुशासन, आत्मविश्वास र एकता विकास गर्छ।”
खेल जगतलाई हार्दिक बधाई
समसेरपुरमा सुरु भएको यो प्रतियोगिताले स्थानीय स्तरमा खेलकुदप्रति उत्साह थप्नुका साथै महिला सशक्तीकरण अभियानलाई अझ सुदृढ बनाउने विश्वास गरिएको छ।
यस ऐतिहासिक प्रतियोगिताको सफल आयोजना, सहभागी सम्पूर्ण खेलाडी, प्रशिक्षक, आयोजक र खेलप्रेमी दर्शकहरूलाई खेल जगतप्रति समर्पणका लागि हार्दिक बधाई तथा शुभकामना व्यक्त गरिएको छ।
फागुन ९ गते समापन समारोहसँगै प्रतियोगिता सम्पन्न हुनेछ। तर यसले दिएको प्रेरणा र सन्देश भने सुरुङाको खेल इतिहासमा दीर्घकालसम्म स्मरणीय रहने निश्चित छ।