काठमाडौं । सम्पत्ति शुद्धीकरण (मनी लाउण्डरिङ) सम्बन्धी कसुरमा पक्राउ परेका बिचौलिया इनम सापकोटा जिल्ला प्रहरी परिसर काठमाडौंको हिरासतमा छन्। पूर्वप्रधानन्यायाधीश चोलेन्द्र शमशेर जबरासँग सम्बन्ध देखिएपछि प्रहरीले उनलाई असोज १४ गते पक्राउ गरेको थियो।

इनमसँग सम्पर्कमा रहेका लगानी बोर्डका पूर्वप्रमुख कार्यकारी अधिकृत (सीईओ) सुशील भट्टलाई पनि प्रहरीले पक्राउ गरी अनुसन्धान गरिरहेको छ।

अदालतमा विचाराधीन व्यवसायी दीपक भट्ट र सुलभ अग्रवालसम्बन्धी मुद्दामा चलखेल गरेको आशंकामा असोज ११ गते पूर्वप्रधानन्यायाधीश जबरा पक्राउ परेका थिए। तर, मुद्दा चलाउन पर्याप्त प्रमाण नभेटिएपछि उनी रिहा भएका थिए।

आफूलाई जबराले प्रयोग गरेको इनमको दाबी

प्रहरीले इनम सापकोटासँग बयान लिने क्रममा उनले आफूलाई चोलेन्द्र जबरा र उनको समूहले प्रयोग गरेको दाबी गरेका छन्।

प्रहरी अधिकारीहरूसँग उनले भनेका छन्, “चोलेन्द्र श्रीमान् र उहाँको टिमले मलाई युज गरेको हो।”

मुद्दामा सेटिङ मिलाउन जबराको समूहले नै आफूलाई विभिन्न गतिविधिमा संलग्न गराएको इनमको जिकिर छ। उनले जबरालाई यस प्रकरणको मुख्य योजनाकारसमेत बताएका छन्।

इनमका अनुसार जबराले आफ्ना निकटस्थ न्यायाधीशहरूमार्फत मुद्दामा सेटिङ गर्ने गरेका थिए। उनले वर्तमान प्रधानन्यायाधीश मनोजकुमार शर्मा र अब्दुल अजिज मुसलमानलगायतका न्यायाधीश जबराको निकट रहेको दाबी गरेका छन्। यद्यपि यी दाबीहरूको स्वतन्त्र पुष्टि हुन बाँकी छ।

जबराको छोरामार्फत भएको थियो चिनजान

जर्मनीबाट जलवायु परिवर्तन विषयमा विद्यावारिधि (पीएचडी) गरेका इनम भारत, जर्मनी र अमेरिकामा बस्दै आएका थिए। प्रहरीका अनुसार उनीसँग अमेरिकाको ग्रिनकार्डसमेत रहेको छ।

इनमले प्रहरीलाई दिएको बयानअनुसार पूर्वप्रधानन्यायाधीश जबराका छोरामार्फत उनी जबरासँग नजिकिएका थिए। दुवै जना ललितपुरको हात्तीवनस्थित लिटिल एन्जेल्स स्कुलमा अध्ययन गरेका थिए। विद्यालयको पूर्वविद्यार्थीहरूको कार्यक्रममा भेट भएपछि उनीहरूबीच चिनजान भएको इनमको भनाइ छ।

पछि जबराले आफूलाई राजनीतिक गतिविधिमा जोडिन र नेपाली कांग्रेसका नेताहरूसँग सम्बन्ध विस्तार गर्न आग्रह गरेको इनमले बताएका छन्।

कांग्रेसका नेताहरूसँग सम्पर्क विस्तार

इनमका अनुसार जबराकै आग्रहमा उनी पूर्वगृहमन्त्री बालकृष्ण खाणसँग नजिकिएका थिए। खाणमार्फत नेपाली कांग्रेसका पूर्वसभापति शेरबहादुर देउवासँग पनि चिनजान भएको उनले बताएका छन्।

त्यस्तै, व्यवसायी दीपक भट्टसँग पनि जबराले नै सम्पर्क गराइदिएको इनमको दाबी छ। नेपाली कांग्रेसका पूर्वमन्त्री दीपक खड्काले आफूलाई भट्टसँग भेट गराएको उनले बताएका छन्।

इनमका अनुसार दीपक भट्ट र सुलभ अग्रवालको मुद्दामा आर्थिक कारोबार तथा सहजीकरणका लागि जबराले आफूलाई परिचालन गरेका थिए।

उनले प्रहरीसँग भनेका छन्, “उनीहरूले धेरै पैसा दिन्छन्, म दैनिक डिल गर्न सक्दिनँ । तिमी गएर भेट भन्नुभएको हो।”

उमेश श्रेष्ठसँग जग्गा कारोबारको विषयमा संवाद

अनुसन्धानका क्रममा नेपाली कांग्रेसका पूर्वकोषाध्यक्ष तथा केन्द्रीय सदस्य उमेश श्रेष्ठसँग इनमको जग्गासम्बन्धी कुराकानी भएको ह्वाट्सएप सन्देशसमेत फेला परेको प्रहरीले जनाएको छ।

श्रेष्ठले जग्गाको लालपुर्जाको फोटो इनमलाई पठाएको र उनीहरूबीच चेकको फोटोसमेत आदानप्रदान भएको अनुसन्धानमा संलग्न अधिकारीहरूको भनाइ छ।

इनमले उक्त जग्गा आफ्नो नाममा ल्याउने प्रक्रिया अघि बढेको बयान दिएका छन्।

अनुसन्धान थप व्यक्तितर्फ केन्द्रित

इनम सापकोटा र सुशील भट्टको सम्बन्ध तथा उनीहरूसँग जोडिएका आर्थिक कारोबारबारे अनुसन्धान गर्न प्रहरीले एसपीको नेतृत्वमा विशेष समिति गठन गरेको छ।

यस प्रकरणमा पूर्वप्रधानन्यायाधीश जबरासँगको सम्बन्ध, राजनीतिक नेतृत्वसँगको सम्पर्क, व्यवसायीहरूसँगको आर्थिक कारोबार तथा अदालतमा विचाराधीन मुद्दामा सम्भावित चलखेलका विषयमा अनुसन्धान भइरहेको छ।

नोट: माथि उल्लेखित विषयहरू इनम सापकोटाले प्रहरीलाई दिएको भनिएको बयान तथा अनुसन्धानमा संलग्न अधिकारीहरूको भनाइमा आधारित छन्। आरोपहरूको स्वतन्त्र पुष्टि तथा सम्बन्धित व्यक्तिहरूको प्रतिक्रिया आउन बाँकी छ।