लहानमा गर्भवती तथा सुत्केरी महिलालाई मासिक पोषण प्याकेज वितरण, ५ हजारभन्दा बढी लाभान्वित
भदौ २२, २०८३ · रहमुल
udaypost
रहमुल, लहान, २२ भदौ । सिरहाको लहान नगरपालिकाले गर्भवती तथा सुत्केरी महिलाको पोषण अवस्था सुधार गर्ने उद्देश्यले सञ्चालन गर्दै आएको नियमित पोषण प्याकेज वितरण कार्यक्रम अन्तर्गत सोमबार लहान नगरपालिका–११ का ५० जना गर्भवती तथा सुत्केरी महिलालाई पोषण सामग्री वितरण गरिएको छ। नगरपालिकाको निर्धारित कार्यक्रमअनुसार प्रत्येक महिनाको २२ गते वितरण हुँदै आएको पोषण प्याकेज नगर प्रमुख महेश चौधरीले सम्बन्धित महिलाहरूलाई हस्तान्तरण गरेका हुन्।
पोषण प्याकेजमा चामल, दाल, नुन, तेल, चना लगायतका आवश्यक खाद्यान्न सामग्री समावेश गरिएको नगरपालिकाले जनाएको छ। आर्थिक रूपमा कमजोर तथा विपन्न परिवारका गर्भवती र सुत्केरी महिलालाई लक्षित गरी सञ्चालन गरिएको यस कार्यक्रमले गर्भावस्था तथा सुत्केरी अवस्थामा आवश्यक पोषणयुक्त खाद्यान्नको पहुँच बढाउन सहयोग पुर्याउने अपेक्षा गरिएको छ। नगर प्रमुख चौधरीका अनुसार हालसम्म यस अभियानमार्फत लहान नगरपालिकाका विभिन्न वडाका करिब ५ हजार गर्भवती तथा सुत्केरी महिलालाई पोषण प्याकेज वितरण गरिसकिएको छ। कार्यक्रमलाई निरन्तरता दिँदै लक्षित वर्गसम्म यसको लाभ पुर्याउने नगरपालिकाको योजना रहेको उनले बताए। विशेषगरी अति विपन्न, दलित तथा आर्थिक अवस्था कमजोर भएका परिवारका महिलाहरू यस कार्यक्रमबाट प्रत्यक्ष रूपमा लाभान्वित भइरहेका छन्।
पोषण सामग्री खरिद गर्न आर्थिक कठिनाइ हुने परिवारका लागि नगरपालिकाले उपलब्ध गराउँदै आएको यस्तो सहयोगले गर्भवती तथा सुत्केरी महिलालाई राहत पुगेको स्थानीय लाभग्राहीहरूले बताएका छन्। स्थलगत अवलोकनका क्रममा पनि पोषण प्याकेज प्राप्त गर्ने महिलाहरू तथा उनीहरूका परिवारमा कार्यक्रमप्रति सकारात्मक प्रतिक्रिया देखिएको छ। नियमित रूपमा आवश्यक खाद्यान्न सामग्री उपलब्ध हुन थालेपछि आर्थिक बोझ केही कम भएको र गर्भवती तथा सुत्केरी अवस्थामा पोषणयुक्त खाना व्यवस्थापन गर्न सहज भएको लाभग्राहीहरूको भनाइ छ।
नगरपालिकाले मातृ तथा शिशु स्वास्थ्यलाई प्राथमिकतामा राख्दै सञ्चालन गरेको यो कार्यक्रम लहानमा लोकप्रिय सामाजिक कार्यक्रमका रूपमा स्थापित हुँदै गएको देखिन्छ। स्थानीय तहबाट प्रत्यक्ष रूपमा लक्षित विपन्न परिवारसम्म पुग्ने यस्ता कार्यक्रमले मातृ स्वास्थ्य, पोषण सुरक्षा र सामाजिक संरक्षणमा समेत योगदान पुर्याउने अपेक्षा गरिएको छ।
.singleRelatedNews a { font: 400 20px/32px 'Mukta', sans-serif; color: #00ba96; }प्रतिक्रिया दिनुहोस
खबर पढेर तपाईलाई कस्तो महसुस भयो ?
प्रतिक्रिया दिनुहोस्
अहिले सम्म कुनै प्रतिक्रिया छैन। पहिलो प्रतिक्रिया दिनुहोस्।